د شهید استاد رباني د ښوونې او روزنې پوهنتون په نهه پوهنځیو کې د روزنيزې ارواپوهنې د مضمون د تدریس د ستونزو ارزونه

روزنيزه ارواپوهنه د ارواپوهنې له بنسټیزو څانګو څخه ده چې د تدریس د کیفیت په لوړولو او د ښوونې او روزنې د بهیر په اغېزمنتیا کې مهم رول لري.

دا څېړنه د مختلط میتود (کمي او کیفي) له لارې ترسره شوې او احصایوي ټولنه یې ۳۱۰ محصلان او د ارواپوهنې څانګې ۱۰ استادان وو؛ معلومات د پوښتنلیک له لارې راټول او د SPSS په مرسته تحلیل شوي دي.

موندنې ښيي چې د مضمون پر وړاندې د محصلانو بې‌علاقګي د تدریس پر اغېزمنتیا منفي اثر لري، خو فعاله ونډه او منظم ګډون د تدریسي بهیر د ښه کېدو لامل ګرځي.

که څه هم د نوو تدریسي میتودونو کارول د محصلانو رضایت لوړوي، خو د درسي خونو نامناسب فزیکي چاپېریال، د فردي توپیرونو نه مراعات او د استاد–محصل عاطفي اړیکو کمزوري لا هم اساسي خنډونه دي.

همدارنګه استادان د درسي ساعتونو ډېروالي، د مطالعوي منابعو کمښت، د علمي تجربو د تبادلې نشتون او د مسلکي ودې پروګرامونو، په ځانګړي ډول ورکشاپونو، له کمښت سره مخ دي.

څېړنه پایله اخلي چې د دغو ننګونو حل نه یوازې د تدریس کیفیت لوړوي، بلکې د تعلیمي نظام په پیاوړتیا کې هم بنسټیز رول لوبوي.

ماخذ: عظیمي، شرف‌الدین. (۱۳۹۶). د شهید استاد رباني د ښوونې او روزنې پوهنتون په نهه پوهنځیو کې د روزنيزې ارواپوهنې د مضمون د تدریس د ستونزو ارزونه. د ماسټرۍ تېزس، د کابل د ښوونې او روزنې پوهنتون.